ايام الورعنه ومااادراك ماالورعنه

السلام عليكم ورحمه الله وبركاته


صباحكم بالخير يالعمال العماليه
..................................... مساكم بالخير يالعمال العماليه
ماتعطونا بنتكم الحلوه الجميله
........................................ مانعطيكم هيا الإ بالف وميه
ندخل على دياركم ونكسر أبوابكم
.................................................. .... وهذي عروستنا



هذا الزمن الأقشر اللي عشناه فيما مضى

عصر ماقبل البطاره ... عصر الورعنه

أعتقد كل شخص فوق الـ 18 مر على هذا العصر الأغبر .. واللي مامر على هالعصر لايكمل يقراء الموضوع علشان برستيجنا مايهتز

هالزمان راح أقسمه لأيااااام .. علشان تعيشو الجو



أياااااام الكشخه

الكشخه فينا تلبس الطوق والبكله والشراب القصير أبو كشكش وحاطه من الروج الأخضر السحري "اللي بعد خمس دقايق يقلب أحمر .. كأنها مصاصه دماء .. " ماعاد الشكل يصير برئ هي وذا الروج

واللي تلبس الفستان المكسره "اللي من تحت مليان جيبون" اللي حزام الفستان يسحبل بالشوارع وله كتافات أسفنجيه عاليه الجوده

وماننسى طبعاً مبدا الزي الموحد عند العائلات .. ثنين ولاثلاث من البزارين لازم طقم


اياااااام بقاله أبو سعيد

الوحده منا تركض للبقاله بقميصها القطن "اللي شاريته لها أمها من البياعه اللي تجي عند بابهم " تشتري ببسي أبو كيس>>>> بنص ريال .. وتشتري معه البسكوت الأخضر اللي بالموز >>>> يالله كرم النعمه

ولا أيسكريم أربعه بواحد ابو ريال "البرتقالي - والأحمر - والأخضر - والأصفر" اللي يتقاسمونه ورعان البيت كلهم ...ويحظها لو صارت العلبه لها لحالها يقعد ثلاث ايام بالثلاجه وهي تلط منه



أياااااام التصرفات الهمجيه

حدث ولاحرج .. مدري عاد هالتصرفات توارثتها الأجيال ولا لا

بقلوب صافيه كنا نزعل ونرضى من اللي زعلنا بسرعه بس شرط أساسي أصبعه الخنصر لازم يتصالح مع أصبعي أنا <<<

لا بس هذي تهون عند طريقه الحلف " لاحول ولاقوه الأ بالله " حط أصبعك في فمك ولازم يمتلي الأصبع من السعابيل وبعدين مردغ فيها حلقك .. الحين تصير صادق

أما اللي بيعلم أنه تسذوووب يمد لسانه ويطير لسانه بأصبعه
>>>> ماأعتقد اني وفقت بهالشرح



أياااااام التلفزيون

طوووووووووووووووووط >>>> فجرت أذانيكم صح ... والشاشه الملونه ... ولا ترن تن تررررن ترررن >>>> هذي النغمه لمى يحطون شاشه الساعه .. ومن تجي عشر .. يبدا القران وبعد أفلام كرتونهم الماصله


أنا أذكر بشار اللي ضيع أمه والدببه اللي بمدينه النخيل وحبيب قلبي الليث الأبيض
>>> ماني بصاحيه كنت أحب الحيوانات مو الأوادم ..

بس تطورت وحبيت روبن هود وزورو وهايدي وسالي .. هذا التطور يمكن على اخر ايام الأبتدائي

وصرت أتابع أفتح ياسمم .. وبدر وأنيس .. ياحبي لهم

>>>> الحمد لله والشكر من بعد شخصيات الكرتون .. صرنا نحب أنيس

وبعد هالتطور صرت أتابع برنامج الأطفال وأغانيهم الماصله
والأفلام الهنديه .. اللي كانو يجيبونها على القناة الثانيه

فلم الولد والفيل

وفيه فلم ثاني اللي الحرمه تقطع العقد اللي لابسته عند المعبد >>> يعني طلقت زوجها


وبعد التطور " أمحق " تسنعنا وصرنا نتابع مسلسلات ..."مسلسل عبدالله البحري وعبدالله البري" .. "ومسلسل عواد" .. "وصح النوم" .. "وفايز التوش""ومسلسل جواهر .. اللي فيه زوينه وحمد وجواهر "<< ماكنت احب زوينه الشريره

أيااااام الأناشيد


متى يجي بابا
يجي الساعه سته
راكب ولا ماشي
راكب باسكيلته
حمرا ولا بيضا
بيضا زي القشطه

>>> العن ابو المصاله

سويره راحت البر
تجيب العيش الأخضر
واتحطه بالصواني
على جية خوالي
خوالي يا دلالي


أياااام الدلاخه

أنا أشهد اني كنت اكبر دلخه في تاريخنا .. بس الحين يوم كبرت .. أذكى مني مافيه

>>>> لايكثر

يكفي اني ماانام الليل من الوسوسه اللي فيني " مره كنت العب بالحوش وقرصتني نحله مادري نامس>>> من الدلاخه ماأفرق بينهم

المهم أكتم الوجع اللي فيني وأكمل لعب وإذا جيت انام فاضيه مافيه شي عندي غير التفكير .. قمت اوسوس .. أتاكد اني طبيعيه .. المهم شفت في يدي نفخه بسيطه "مو من النامس مدري من وش" .. بس أول ماطرى على بالي الناموسه اللي قرصتني .. والحين يجي تأثير التلفزيون علي ..هي والبرامج الوثائقيه اللي تجيبها عن المستنقعات والجراثيم اللي فيها وتنقلها لنا النامس

قلت الحين بأموووت .. واروح اصحى اختي والظاهر جيراننا كلهم صحو من صياحي ..أقول لها أنا بأموووت .. المشكله اللي بكبري كلهم صاحو معي ..

وأتفقد يد أختي أنا عندي نفخه بأيدي أنتي ليه ماعندك لاااااااا ..لاااااااااااااااائهي ئهي ئهي >>> صيحاها يوم انها بزر

وأتفقد يديني ورجليني وكراعيني وأطلع وجه الشبه بين كراعين اختي .. لو فيه أختلاف بسيط .. زاد الصياح ثم أقعد أتفحص عيوني بالمرايه ..أنا عيوني حمراء لااااا راح أموووت >>> حمرت من البكاء

وعلى هالحال لين يصبحون الناس .. وبعدين أكمل يومي عادي وإذا جاء وقت النوم نعيد هالأسطوانه وأروح أتفقد نفسي أنا طبيعيه ولا راح أمووت



أياااام المدرسه


أول يوم دراسي .. والكرتون الكبير اللي يجيبه ابوي من المكتبه وكلها محتوياته من ذوووقه " درزن دفاتر أبو ثمانين ولا ستين _ فروووخ لتجليد الدفاتر _ برايه أم مرايه وأشياء لاتعد ولاتحصى .. ويجي دور الهجوم على الغنائم >>>> أول مره يشوفون شي جديد

لا والمطاره وماأدراك ماالمطاره .. كنت أروح بمطارتي واليوم الثاني أتبادل أنا وأختي بالمطاره

>>> العن أم القرف يعني ينقال لها انها بتكشخ يآأليت اناناسه كآانت معي في هالمرحله ههههههههه

لا والسلام الملكي حق المدرسات .. من تدخل المدرسه الكراسي والطاولات يبن ينحاشن من اصوات البنات " شرفتينا ونورتينا ياابله نوره ...... نوره ياعيوني ياللي لابسه اليموني لابسه الساعه اللماعه تسوى كل الجماعه


أيااااام الممنوعات

كان الأتاري من ضمن الممنوعات في بيتنا .. أو بمعنى أصح مايجي من نفسه لازم له طراره من البزارين علشان يسمح له دخول منزلنا ..

أذكر كل ماقلنا لأبوي نبي أتاري .. قال لنا الأتاري مااسمع له طاري

كان الميك أب عيييييب

بس أزين شي ان طلعت الشارع عادي

كانت فيه أشياء كثيره ممنوعه بوقتها ... كل ماأذكر أني أصيح لمى يرفضونها أحس ان البرائه بتشقق بعضها ..
>>>ايه هين


ملحوووظه

* واللي مامرت عليه هالأشياء ولا عاصرها .. لايتفلسف هنآأا .. ويطلع برا

* واللي من ربعنا يشارك بذكرياته الماصله معنا